Davao City – Sa mga panahon susama niining atong nasinatian karon diin gihulga ug gikuso-kuso kita’g maayo sa mga trahedya ug kalamidad kaliwat’t kanan, karon ang hustong panahon nga atong hugoton ang way kinutubang kusog, inspirasyon ug kalig-on sa atong tagsa-tagsa ka mga dughan ug kaugalingon.
Ug asa nato mabatonan ang kahupay sa pagbangutan nga atong na-eksperyensyahan karon sa atong mga kasingkasing bunga sa bagyong ‘Urduja,’ ‘Vinta’ ug NCCC Mall Tragedy?
Diha ba sa tawhanong kahupayan sa atong gihambin karon nga tumang kasubo, kasuko ug kaligutgot sa kamatayon sa atong mga mahal sa kinabuhi sa trahedyang wala nila hidamha?
Dili, kay ning kalibutana, wala ‘tay sarang kasandigan nga masaligan: Dili ang tawo kay ang tawo dali rang mausab, dili usab sa kalibutan kay ang kalibutan puno sa daghang mga pagsulay, labaw nang dili usab sa atong kaugalingong kahibalo, kinaadman, kahanas or katakos kay matud pa gani sa uban, ‘ang tao – o ang abilidad ng tao – ay meron talagang hangganan’ – kay tawo ra lagi intawon ‘ta.
Ngano, makapugong ba ‘ta sa naghaguros nga tubig-baha? Mapugngan ba nato ang nagdilaab nga kalayong molamoy sa atong pisikal nga lawas? Makatagna ba kita kun unsang katalagman ang sunod mohapak kanato ug atong mga banay?
Salig kita sa Kahitas-an kay solamente ang Diyos lamang maoy labing nasayud sa tanan. Kun gitugtan man ugaling Niya nga mahitabo ang nahitabo na, wala kitay katungod nga mo-kwestion sa iyang kabubut-on kay yanong binuhat lamang kita Niya.
Sa mga higayon nga dili na nato masabtan pa ang nagapanghitabo ug magpasulabi na unya ang atong kasubo ug kawalay pagsalig sa Kalangitan, when we can no longer understand what’s happening to us and we’re running out of strength, let us cling to God alone and not to anything else (Romans 8:28).
Ning panahon sa Kapaskuhan, hinumdoman nato nga taliwala sa atong mga pagsulay, wala kita mag-inusara. Kun sa dihang imong gilantaw ang mga lakra sa dalan ug imong nakit-an nga usa lamang ka paresan sa marka ang imong makit-an, kalimti ayaw nga dili kadto imo: Iya kadto sa atong Magbubuhat sa dihang Iya kitang gisapnay sa iyang mahigugmaong mga bukton sa dihang kita nahitumpawak na sa kaalaotan ug gani dili na nato kayang salbaron pa ang atong kaugalingon.
Hinundoman nato nga adunay usaka Magbubuhat nga nagpakatawo biniyaan ang himaya sa Kalangitan gumikan lamang sa dili matukib nga matang sa gugma Niya kanatong iyang mga binuhat. Sa tanan, usa ka Malaumon nga Pasko ug usaka Mabungahong Bag-ong Tuig nga moabotay pa sa atong tagsa-tagsa ka mga kinabuhi ibabaw ning kalibutan!
RadyoMaN June Duterte
