Davao City – Karon na ang hustong panahon nga seryosohon sa atong gobyerno ang pagtono ug maayo sa atong mga labor policies, ilabi na niadtong may kalambigitan sa kaugmaon sa atong mga overseas contract workers kun migrant workers.
Dili na nato tugtan pa nga aduna pay mosunod kanila ni Flor Contemplacion, Delia Maga, Joanna Daniela Demafelis ug Josie Lloren kinsa igo lamang nanimpalad sa tinguha nga mahaw-as ang pamilya sa kapit-os ug kawad-on apan kamatayon na hinoon ang ilang naangkon.
Let these unfortunate events signal the very last where Filipino workers are abused and maltreated simply because we belong to a Third World country.
Himoon natong tagumbanan kun pundasyon ang mga kaso sama sa mapait kaayong gisangpotan ni Demafelis, himoon natong palisiya gikan karon nga did-an ang mangabroad ilabi na ngadto sa mga nasud diin dili maayo ang working conditions sa mga OFWs.
Himoon natong sumbanan ang nasangpit nga mga kaso aron subli natong pugngan ang human trafficking, ang paggula sa mga undocumented Pinoy workers, kadtong pogoso gayud nga molarga pinaagi sa ‘southern backdoor’ nga walay pertinenteng papeles diin ang resulta, mamahimo na hinoon silang mga palaboy-laboy kun makalulu-oy kaayong mga runaways.
Tamdon na nato ang hugot nga pagbantay haron walay Pilipinong mahisalaag sa iyang gitmithi ug gidamgo nga bisan kalbaryo ug impyerno ang naghulat kanila, modasdas lamang gihapon kay lagi pobre man kita nga nasud ug katawhan.
Hagit kini sa atong gobyerno nga hikutaron ang klarong pangempleyo haron dili na molalin pa ang atong mga workers aron ibuhi lamang sa ilang pamilya.
Hagit kini kanatong tanan nga kun man ugaling dili gayud nato mapugngan, nga ang OFW mobyahe apan didto lamang sa mas klarong luwas nga mga su-ok sa kalibutan ug diin protektado ang ilang yanong pagpanarbaho.
RadyoMaN June Duterte
