Davao City- Nagkahiusa karon ang katawhan sa syudad sa Davao sa panawagan ngadto sa mga tigdumala sa NCCC Mall nga aksyunan gilayon ang mga mulo ug yangungo sa mga residente kinsa nagkapuliki karon ug panampong intawon sa ilang ilong ug ginhawaan gumikan sa grabeng kabaho nga di masingo nga gikan sa nasunogan.
Nanawagan karon ang katawhan ngadto sa management sa maong balay-pamatigayon alang sa hinanali nga aksyon kay basin unya ug mosangpot pa kini sa mas samot nga suliran sa kalawasan gumikan sa mahanggab nga grabeng di maantoy nga kabaho nga posiblementeng mosangpot pa gayud sa sakit kun balatian.
Gihangyo usab sa katawhan ang City Health Office nga dili gyud lung-an kining maong suliran ug nga dut-an pa ug maayo ang tag-iya sa establisimiento hangtud nga ilang hinloan ang source kun tinubdan sa maong dilemma.
Gumikan kay health issue kini, health department gayud ang angay manguna sa pagresolba ning nasangpit nga predicament gani may pasalig na man ang mga tinugyanan nga adunay mopahigayon ug ‘flushing operation’ ug pag-disinfect mismo sa area karong adlawa.
Kining tanan gikinahanglang buhaton sa paspas kun mabilisan nga pamaagi kay health baya ang atong gihisgotan ning tungora haron dili madugangan ang problema sa dihang mahitabo na hinoon ang usaka epidemya.
Katapusan, aduna usay merito ang sugyot nga ipailawom na lamang gayud sa total demolition ang maong fire scene aron matunhay ang tanan ug mapanalipdan nato ang atong mga yanong lungsuranon nga mamahimong sunod nga biktima sa katalagman sa kasanihan ug panglawas.
RadyoMaN June Duterte
