Davao City – ‘Sa korte ka na magpaliwanag.’
Kini maoy angay direksyon kun hustong rumbo sa deklarasyon ni DILG Undersecretary Martin Diño nga ubay-ubay nga mga nidaug nga barangay officials niadtong May 14 apil man diay diha sa drug watchlist sa gobyerno.
Angayan lamang nga kadtong listahan nga gi-anunsyo ni Diño dili lamang matapos kutob diha sa media publicity kon dili ngadto gayud sa aktwal nga pag-file sa tukmang kaso ngadto sa mga gipunting niini.
Kun dere lamang kita magtagawtaw sa media, ang war on drugs subling mabulit sa daghang mga pagkwestion sama sa impresyon nga kini porma lamang sa propaganda nga walay kalahian sa tsismis ug tabi-tabi lamang diha sa kadaplinan o bin ba kaha diha sa tapok-tapok ug tubaan.
Kun kutob lang ‘tas istorya, ang labas niana harassment lamang sa mga anaa sa poder ngadto sa ilang mga kaatbang sa pulitika – dili nato tugtan nga i-trivialize kun yano-yanuhon lamang ni bisan kinsa ang usaka kritikal ug life-and-death scenario nga kampanya kontra iligal nga droga.
Hagiton nato ang DILG, PDEA, PNP ug uban pang law enforcement agencies sa pamunuan nga dad-on ang krusada kun war on drugs ngadto sa ensaktong plataporma kun gantangan: Solamente ang atong hukmanan lamang.
Ang maghukom dili ang opinyon, emosyon o impresyon sa publiko o mabagang duot sa katawhan sanglit kana nga sukdanan pwede kaayong masambugan sa bias ug dili patas nga pagtratar.
Korte lamang gayud ang nag-inusarang angay lantawon nga labing mahukmanon gamit ang gibug-aton sa ebidensiya kun ‘quantum of evidence’ sanglit diha sa natad sa legalidad, facts or kamatuoran lamang bugtong mag-decidir kun ang akusasyon ba kontra sa mga gi-alegar nga narco politicians matuod gayud or purely intriga lamang.
RadyoMaN June Duterte
