Davao City – The new normal is the abnormal.
Gustohon man nato’g sa dili, kini na ang nagbansiwag karon nga bag-ong realidad sa atong panahon diin ang wala nato hidamha, mao na man hinoon ang nagapanghitbao.
Kun nagtoo ‘ta nga dili ‘ta bahaan or malunopan or madahilian sa yuta, nasayop ‘ta: Karon ang daw nag-wild nga kinaiyahan dili na gayud nato intawon matagna pa.
Kalit kining molagubo sa mga komunidad nga kaniadtong panahon wala gayud intawon maka-eksperyensya sa katalagman sama pananglit sa New Bataan, ComVal, Ormoc ug Tacloban ang pangutana kun andam ba ang katawhan sa pagkunsad sa makalilisang nga kalamidad.
Atong hinundoman kanunay ang atong mapait nga kasinatian mugna sa mabangis nga trahedyang ‘Sendong,’ ‘Pablo,’ ‘Yolanda’ ug karon si ‘Urduja’ ug si ‘Vinta.’
Magpakabana kita, dili nato hulaton ang ‘forced evacuation order,’ kon sa atong tan-aw anaa na nagsingabot ang nag-umidong kalamidad, mas maayong molalin na sa mas luwas nga dapit ilawom sa direktibang ‘pre-emptive evacuation.’
Batasanon na gayud nato ang pag-master sa disaster response sanglit wala na ‘tay mahimo pa sa aktwalidad nga matag tuig, dili moubos sa 20 ka mga tropical storms ang modabo-dabo sa atong nasud Luzon, Visayas ug Mindanao.
Hugot usab natong gihagit ang atong mga awtoridad nga ensigidang ipa-implementar ang ‘No Build Zones’ diha sa mga storm surge, flashflood and landslide-prone areas sa tagsa-tagsa nato ka mga lokalidad.
Atong agnihon ang atong mga lungsuranong nanimuyo daplin sa mga suba or sa kabaybayunan ba kaha nga seryosohon ang pagbalhin sa mas luwas nga mga porsyon aron dili sila mamahimong kandidato sa disgrasya por se caso lang nga motugpa kanato ngari ang mabangis ug makalilisang nga mga kalamidad ug katalagman.
Stay safe sa tanan, mag-amping ‘ta permanente ug mangaliya ‘ta kanunay ngadto sa Kahitas-an nga iiway Niya ang atong mga dalan sa matag adlaw natong paglakat haron dili ‘ta maapektaran sa mga dili maayong panghitabo sa kinaiyahan ug kalikupan.
RadyoMaN June Duterte
