Davao City – Dili ako uyon sa sugyot-balaudnon ni Davao First District Rep. Karlo Alexei Nograles nga ipadaplin na ang naandang ‘no tattoo’ policy diha sa naandang police recruitment procedures aron maka-apply bisan kadtong disqualified kaniadto gumikan sa nasangpit nga limitasyon.
Alang nako, adunay mga talamdan nga mas maayong atong ipabilin inay nga atong usbon aron lamang sa pag-akomodar sa panglantaw sa pipila ka mga hut-ong o sektor.
Dili ako kumbinsido sa argumento ni Nograles nga gumikan kay ‘archaic’ kun karaan na kini nga lagda nga ato na kini gilayong bag-ohon ug ipadaplin.
Ako nagtoo nga ang usaka balaud, resolusyon, aksyon o kalagdaan mapanday siya gumikan sa dakung katuyuan nga maoy nagtukmod sa iyang pagpasar diha sa hawanan sa atong mga balay-balauranan lokal man o nasyunal.
Wala nagpasabot nga como uso ang usaka butang o aktwasyon nga ato na lamang ibale nada ang atong ginahimo sa pagkakaron – gawas lamang kun ang atong naandan atong napruwebahan nga mohatud lamang diay ug kadaut sa kadaghanan sa atong katilingban.
Mas pili-on ko gihapon ang usaka tinugyanan sa balaud kinsa hinlo ang pamayhon ug walay makita nga pisikal nga sami sa iyang pagka-siya.
Gani, ato pa mang gihimong mas malisud ang pag-entra sa nasudnong kapulisan ug kasundaluhan pinaagi sa ‘rigorous requirements’ kun mas istrikto nga mga reglamentos sama sa physical tests haron ang mapili kadto lamang gayud nga ‘best of the best and the finest’ dili kay kadtong adunay kapanig-ingnan sa mga gangster ug sa mga dautan.
RadyoMaN June Duterte
