Davao City – Daku akong uyon sa latest warning karon ni Pres. Rodrigo Duterte ngadto sa mga langan-langanon kaayong mga road infrastructure project contractors nga tapuson gilayon ang ilang mga trabaho haron dili maperwisyo ug maayo ang tawo.
Uyon usab ako nga kadtong mga kontratistang dili maayo ang track record, hukasan na nato sa ilang gigunitan karon nga mga proyektong delatado, i-rescind ang tagsa-tagsa nila ka mga kontrata haron mahatag nato sa mga mas kwalipikado ug mas preparadong public works contractors kay anugon ang mga adlaw nga walay natikad nga road works.
Uyon ako nga kadtong arang ka salawayon, kadtong gigamit lamang ang ilang lisensya aron ipa-subcontract ang proyekto kay wala silay igong mga heavy equipment ug igong gidaghanon sa mga personahe hingpit na natong ipa-blacklist sa mga accredited infrastructure operators.
Uyon usab ako nga rebisahon kining ‘lowest bidder scheme’ ilabi na sa kontensyon nga gigamit lamang kining convenient alibi kun scapegoat aron dulaon ang resulta pinaagi sa panagkonsabuhay sa mga korap nga kontratistang kaalyado sa mga kawatan sulod usab sa gobyerno.
Alang nako, mas maayong palig-onon sa gobyerno lokal man o nasyunal ang tagsa-tagsa nila ka mga local construction capabilities pinaagi sa pagpailawom sa mga road works ‘by administration’ sanglit ang gobyerno wala man diha sa pagnegosyo, kon dili, ang nag-unang motibasyon mao man ang matuod nga serbisyo publiko.
We deserve the best and the finest kind of public works projects ug angay lamang natong mabatonan ang pinakamaayong klase sa trabaho sa mga kadalanan ug uban pa sanglit nagbayad baya kita sa hustong buluhisan.
Atong sundogon ang pilosopiya ug mentalidad sa mga nagmalamboong kanasuran sa kalibutan nga kun maghisgot gani ‘ta ug government services, atong gihisgotan ang pinakamaayong serbisyo – sa road projects, sa medisina ug uban pang serbisyo-sosyal sa atong mga lungsuranon.
RadyoMaN June Duterte
