Davao City- Samtang padayun ang pagsi-aw sa mga insidenteng gikalambigitan sa atong kabatan-onan either as perpetrators of crimes or as victims, padayon usab kitang nagapangutana kun asang bahina kita nasayop ug unsa usab ang mamahimo ug angayan natong tomaron nga aksyon.
Naa na tingali dinha ang subling pagpahinumdom sa tanan sa usa ka walay kamatayong kamatuoran: ‘It takes a village to raise a child,’ buot ipasabot nga ang kaugmaon sa usaka batan-on anaa gayud una sa nga tanan dinha sa kamot sa mga ginikanan inubanan sa nagkadaiyang sektor kun hut-ong sa atong mga komunidad ug katilingban.
Timan-i nga ang batan-on wala pay igong huwisyo, kulang pa sa hingpit nga pamensar ug kahimatngon sa unsay maayo ug dautan ug haguka sa ilang ikasarang.
Entonces, anaa sa kamot sa mga ginikanan silbing ilang ‘first line of defense’ sa kun unsa ang angay niyang hikat-onan sa kinabuhi: Dili ang kabuang kon dili ang hustong pamatasan, mga maayo ug moral nga tinoho-an ug baruganan sa mga sitwasyon sa ilang kinabuhi.
Kun mabuhat nato kini nga mandato, may kasandigan unya kita nga pasalig nga dili gayud sila mahitumpawak sa tumang kaala-otan gumikan kay sa ilang pagtubo, anaa man kita sa ilang kiliran aron sila giyahan sa saktong dalan nga pagalaktan.
Pikas bahin, kun tugtan natong wala kitay pagpakabana kun pakialam sa ilang mga aktwasyon kun binuhatan, daw mao ra gihapon nato’g gitambug sila sa lim-aw sa kadaut ug kapakyasan.
Ang kabatan-onan maoy atong kaseguruhan nga ang kaliwatan molungtad pa’g maayo ngadto sa unahan. Dili nato tugtan nga sila mahikawan sa tanang proteksyon gikan sa mga hulga sa kahilway sa ilang kinabuhi ug sa maayong ugma. Kun mapakyas kita dinhang dapita sa atong kargo ug responsibilidad, dili na nato ikatingala kun padayon sa pagdaghan ang mga badlongon ug buluyagon. Apan kun kita maningkamot sa taman sa pagpahimutang sa matag batan-on diha sa angay niyang mahikutaran, nan hinanok kitang mahikatulog uban sa realisasyon nga hilway ugma damlag ang dangatan ning atong nasud-Pilipinas.
RadyoMan June Duterte
