Davao City – Dili ikalalis nga maayo, dalaygon ug talahuron ang tumong sa 4Ps nga programa sa administrasyong nasyunal ug niini, angay lamang natong pasalamatan ang rehimen gumikan sa paglantaw sa sitwasyon sa atong mga lungsuranong kabus ug timawa intawon.
Apan aduna akoy pipila ka mga sugyot nga atong buhaton haron mas molambo pa kining maong programa sa gobyerno:
Una, padak-an pa kini inay nga atong wagtangon. Ako nakasabot sa gibati sa mga wala mahiapil sa among programa mao man gani nga kun makaya ra unta sa atong nasudnong panudlanan, atong padak-an pa ang coverage niini.
Ikaduha, susihon nato pag-usab ang implementasyon niini: Tinood ba nga apil sa mga nakabenepisyo mao kadtong mga aranga-arangan sa kinabuhi kay kun mao kana, atong itono ang programa haron ang main target beneficiaries mao gayuy angay modawat sa asistinsiya ug hinabang-pinansiyal.
Ikatulo, gawas sa 4Ps, dugangan nato kini pinaagi sa pagtagana ug konkretong programang pangkabuhayan kun panginabuhian.
Okay man ang ‘direct intervention or assistance’ apan ako nagtoo sa gihapon nga dili limos kun hinabang ang atong labaw’ng gikinahanglan karon kon dili pupaigong trabaho ug oportunidades diin hasta kadtong walay grado, kadtong atua sa kabukiran ug kadtong anaa sa kinatumyan nga bahin sa kapupud-an makasinati sarang bisan sa diyutay’ng alibyo sa kawad-on ug sa kalisud sa kinabuhi.
Kun ato kanang mabuhat, ako nagtoo nga mas makabarug nga lig-on ug mas mahatagan nato ug igong kusog kun ‘empowerment’ ang mga yanong lungsuranon nga mamahimo silang aktibong partisipante sa dugang pagpalambo sa atong nasud ug kasyudaran.
RadyoMaN June Duterte
