Davao City – Dili gayud ikalalis nga anam-anam na nga nanagsaka ang presyo sa mga nag-unang palaliton sa atong mga merkaduhan karon gikan sa gagmay’ng mga panginahanglanon sa tawo ngadto sa pinakadaku nga produkto o serbisyo ba kaha.
Kana gumikan ra usab sa pagsutoy sa presyo sa petrolyo nga atong gi-angkat gikan pa sa langyaw’ng mga tinubdan ingon man ang pagsaka usab sa atong buluhisan sama sa pag-introducir sa TRAIN Law kansang tumong mao ang pagpangalap ug dugang pondong salapi sarang magamit alang sa massive infrastructure projects sa Duterte administration.
Nan, unsay epekto niini sa yanong konsumante sama nako ug sama nimo? Asa kaha kita molugar haron dili ‘ta magkapa-kapa sa paglobo sa presyo sa lana o bin ba kaha maligsan sa daw nagharugos nga TRAIN Law sa gobyerno?
Alang nako, kining mga sitwasyon karon dili gayud nato kalikayan ilabi na nga net importer gihapon kita sa imported fossil fuel kay dili man gihapon pupaigo ang atong nakubkob nga natural gas sa Malampaya ug wala man kitay laing medyos haron iganar ug taman ang halapad nga programang pang-inprasktraktura nga ‘Build, Build, Build.’
Ang sakit lamang niini mao nga sa matag higayon nga mo-skyrocket ang presyo sa mga basic and prime commodities and services, kitang mga end users sa food chain mao man gayud ang madakdakan intawon pag-ayo gustohon man nato’g sa dili.
Alang nako, obligado ang gobyerno nga depensahan ang yanong tawo ilabi na kadtong wala intawoy ikasarang sa kinabuhi. Denhe mo-entra ang mga poverty alleviation programs sa atong gobyerno haron makasustiner kita sa matag adlaw, dugang usbaw sa panuholan silbing social equalizer, dugang economic and livelihood opportunities haron ang tawo dili makahunahuna ug dautan sa tinguha nga mapakaon ang pamilya ug mabuhi ang iyang mga mahal sa kinabuhi.
RadyoMaN June Duterte
