Davao City – Karon nga nag-decidir na ang Korte Suprema nga tangtangon sa pwesto mismong ang ilang hefe-mahistrado, angayan lamang sundon natong tanan ang hiniusang hukom kun collective decision sa labing hataas nga hukmanan.
Matuod nga anaa ang daghang pangutana, kabalaka ug kahadlok sa uban nga ang ouster ni Maria Lourdes Sereno maghatud sa nasud paingon ngadto sa bung-aw sa authoritarianism kun dictatorship, ang pagkamatay sa gitawag nga judicial independence, check-and-balance, rule of law ug demokrasya.
Ako moingon nga balido kini nga mga argumento sa mga pro-Sereno supporters diin angay natong bantayan ang mosunod nga mga panghitabo.
Ang Sereno ouster angay mosangpot sa pagpahimsog pagbalik sa atong hudikatura, sa pagsalbar sa High Tribunal gikan sa obstructionism kun ang pagsupak sa mga mahistrado sa gitinguha sa presenteng rehimen og ang pagpitol sa daw walay kinutubang gahum sa usaka impeacheable officer nga mobuhat sa bisa’g unsa gumikan kay daw immune siya sa iyang hataas nga lingkuranan.
Alang nako, ang atong mga balaud, ang atong Konstitusyon ug ang mga probisyon niini sama sa ideya kun konsepto sa impeachment ug kining bag-ong nisikat karon nga quo warranto petition pulos kini sila mga ‘dynamic realities’: Buot ipasabot, naga-evolve kun naga-improbar kini diin ang ilang moralidad ug legalidad atong masuta kun mapamatud-an sa pagligid unya sa panahon.
Kun sa higayon nga mogula nga kining Sereno ouster gigamit ra diay sa mga namunuan haron sitahon ang mga kritiko niini, kana maoy panahon nga ang tawo angay na usab nga mogimok aron ang pagpasulabi sa poder mapugngan sa tanan.
RadyoMaN June Duterte
