Davao City – Rekwisito alang sa usaka gawasnong katilingban ang libreng pagpadayag sa atong gibati ug gimbut-an, opinyon, reaksyon ug panahum sa mga nagapanghitabo sa atong komunidad ug palibot.
Ang usaka hiyas kun karakter sa demokrasya mao nga ang yanong tawo adunay susama kabug-at nga parte ug opinyon tupad sa mga kadagkuan ug mga ilado ug pamoso diha sa mga butang diin ang kinatibuk-ang sosyedad nahilambigit.
Apan tupad sa maong katungod sa pamahayag natawo usab ang dili maayong resulta niini sama sa pagkuyanap sa ‘fake news,’ gossip kun tsismis, black propaganda ug smear campaign ug gani ning labing ulahi, sagad kaayong manukad diha sa social media especialmente sa Facebook ug kining presensya sa mga tira-pasagad nga mga bloggers.
Kini nga bag-ong realidad naghagit sa tanan nga buhatan kini ug tukmang aksyon: Una, kaming mainstream media obligadong maneguro nga kadto lamang matuod nga mga taho ang matunol namo ngadto sa tawo ug nga giyahan ang mga tigpaminaw nga dili gayud unta mahaylo sa hinimo-himo lamang nga mga istorya ug sugilanon, mugna lamang sa imahinasyon sa nagpondo sa publikasyon sa ‘fake news’ ug ang pagpataas pa gayud ug maayo sa ‘level of competence’ ingon man integridad sa mga tigbalita ug mga magsisibya haron ang tawo dili malansis sa mga nagtakuban nga media apan diay ‘to binayrang tigpamaba sa usaka vested interest or sector.
Kargo usab sa tibuok katilingban – ikaw ug ako – nga sitahon ug kondenahon kutob sa malisyosong taho nga atong masugata ug madunggan sanglit wala may bisan katiting na lamang nga luna sa usaka responsableng komunidad ang intriga, propaganda ug biased nga opinyon.
RadyoMaN June Duterte
