Davao City – Aron kab-oton ang atong hiniusang pangandoy nga mas hilway nga dagan sa panakayan ug hapsay nga kadalanan alang sa mga motorista, pasahero ug mga pedestrian, kinahanglang magtinabangay kitang tanan.
Angay masabtan sa mga naggunit sa manibela nga dili sila ang tag-iya sa kalsada, nga usa lamang sila nga gihatagan sa pribilehiyo sa maglatas sa kadalanan hinungdan nga gikinahangalan kaayo ang pag-respetar sa ubang mga naga-agian sa atong mga road networks.
Kinahanglan natong i-practice ang prinsipyong road courtesy, road sharing, mutual respect and inclusive mobility pinaagi sa pagtamod sa tanang mga regla ug talamdan nga gidisenyo alang sa kalingkawasan natong tanan.
Walay luna sa atong katilingban ang gitawag nga mga ‘homicidal maniacs’ kinsa kun makagunit na gani sa steering wheel, maora na’g ‘king of the road’ ug arang na lang pagka-kaskasero!
Kitang mga pasahero angay usab motuman sa kun unsay husto sa balaud: Diha ‘ta manukad sa mga loading-unloading zones or areas ug dili ‘ta magpataka ug saka-kanaug bisan asa lang nato type or gusto.
Kitang mga pedestrians angay usab motabuk diha lamang sa mga identified crosswalks, pedestrian lanes ingon man mga pedestrian overpasses haron malayo kita sa disgrasya sa kamot sa mga driver nga daw walay kamatayon.
Sa mga taga-gobyerno, hagit kaninyo nga mag-establisar kita ug dugang mga imprastraktura sa kadalanan aron maseguro nga luwas ang atong pagbyahe, dugang mga pedestrian overpass structures, flyovers, skyways sama sa Metro Manila, subways, coastal diversionary roads ug susamang mga pasilidad aron sa pag-decongest sa nagkabuhol-buhol nga trapiko sa dakbayan.
Kinahanglan usab ang mas lig-on nga koordinasyon sa ubang mga ahensya sa gobyerno aron dili mabalda ang mga sakyanan gumikan kay nagbansiwag ang unfinished roads projects usahay mosangpot pa sa disgrasya!
Ug syempre, hagit usab ngadto sa atong mga road or street enforcers nga hugot ipatuman ang balaud sa dalan: Patas nga pagsita dili kay palabihon ang mga naka-SUV ug mga naggilak-gilak nga behikulo pero kun taxi o PUJ gani paspas kayo mong makagunit sa TOP.
Consistency – kana maoy atong gikinahanglan gikan sa mga tigbalantay sa atong panakayan, dili tanan trabaho mao ang pagdakop apan ang dakung tahas ninyo mao ang pagpahinumdom, pagsita ug pag-edukar sa mga motorista ug mga sumasakay sa kun unsa ang gibawal ug unsay gitugtan diha sa atong mga kalsada.
Safe travel kanatong tanan!
RadyoMaN June Duterte
