Davao City – Nahiabot na gayud ang hustong panahon nga atong usbon ang klase sa atong pampublikong panakayan sibo sa aktwal nga panginahanglanon sa modernong panahon.
Alang nako, panahon na nga atong tangtangon gikan sa kadalanan ang sobra na ka karaan, dilapidated ug arang kapeligrosong matang intawon sa public mode of transportation nga mga PUJ.
Kun gikinahanglan, ato nang estudyuhan kining mini-bus or van system diin mas moderno, maayo, luwas ug paspas nga mga behikulo na ang manerbisyo natong mga sumasakay kay mobayad baya ‘ta ug ensakto, dili ba?
Dili na nato pwedeng gamitong alibi ang panginabuhi nga ciertong maapektuhan sa PUV modernization sanglit ako nagtoo nga daghan man tingali ta’g makit-ang alternatibong panarbaho gawas sa paggunit sa manibela kay naa man ang mga bag-ong yunit nga mamahimo sa gihapon nilang drayban.
Tupad niana, ato na usang tun-an ang uban pang mahinungdanon kaayong mga ancillary or support measures sama pananglit sa pagpahalapad sa atong mga kalsada kun road widening, pagdili sa ‘both sides parking’ sa mga critical road sections, ‘No Garage No Car’ policy, pag-establisar ug mga bypass or diversion roads ug uban pa haron hilway ang atong paglakat sa matag adlaw.
Ako hugot nga nagtoo nga ang pagsulbad sa atong suliran sa mga kadalanan nanginahanglan sa mas komprehensibo, halapad ug ‘wholistic approach’ sanglit kumplikado man ang atong dilemma.
Gikinahanglan denhe nga magtinabangay ‘tang tanan. Safe travel and happy motoring na lang sa tanan!
RadyoMaN June Duterte
