Davao City – Suportado nako ang sugyot-balaudnon ni City Councilor Ma. Belen Acosta nagtumong sa pagdili sa pag-inum inum diha sa mga pampublikong dapit.
Kini gumikan kay daghan nang mga insidente sa panagbingkil diha sa imnanan either sa mga magbarkada o magkumpare ba kaha apan bisan tali sa mga wala gani mag-ilhanay kun mga total strangers.
Labaw sa nga tanan, angay masabtan sa tanang mga drinkers nga nagatan-aw baya kanato ang mga batan-on sa kun unsa ba ugaling atong gihimong mga aktwasyon ug disposisyon sa kinabuhi.
Sayud kita nga ang mga kabatan-onan seguradong makakaplag ug mga pagtulun-an sa kinabuhi dili lamang diha sa atong mga ipangyawyaw ngadto nila apan diha sa hilum lamang kaayo nga pamaagi pinaagi sa ilang makita nga mga gawi ug pamatasan sa ilang mga ginikanan.
Kun kinsa kita sa panan-aw sa atong mga kaanakan, malagmit kana usab ang ilang paingnan sanglit ang batan-on man gud kanunay gayud nagapangita ug modelo aron maoy ilang himoong ehemplo ug sundogon.
Kun ato silang tudloan sa maayong pamatasan kun good manners and right conduct both in private and in public, daku ang purohan nga makabaton kita ug matarong nga mga lideres ugma damlag.
Apan kun ang paghubog-hubog ug pagsusapinday mao na man hinooy atong ikabilin ngadto nila, unsa kahay sunod nga panan-awon nga malagmit mamahimong istilo sa atong mga kabatan-onan ugma damlag: Susama ba sa commercial nga ‘inuman na,’ ‘idaan na lang natin sa mahaba-habang usapan’ pinaagi sa pag-alirong diha sa ilimnong mas naila nga pula nga kabayo?
Ginikanan, aduna kitay dakung responsibilidad ngadto sa atong sunod nga kaliwatan: Ipakita nato solamente ang maayong panig-ingnan lamang, dili ang bisyo-bisyo diin klarong mohatud lamang kanila ngadto sa tumang kaalaotan.
RadyoMaN June Duterte
