Davao City – Sama sa pagtanom og punoan sa kahoy nga gilaumang maoy moprotekta sa kinaiyahan gikan sa kadaot, giatiman kini pag-ayo diha sa iyang pagsalingsing; ingon niini usab ang pagpatubo ang angayan natong buhaton sa atong mga kabataan.
Ang mga bata, isip linghod nga mga miyembro sa katilingban, angay nga giyahan ug di hikawan sa iyang mga katungod aron sa iyang pagdako mamahimo siyang mapuslan sa iyang katilingban.
Sa akong personal nga lantaw, wala man mahikawi ang atong mga bata sa mga katungod nga angay nila nga maoy nakalatid sa Child and Youth Welfare Code. Apan hinuon, kulang pa kini. Kulang pa ang pagtagad sa gobyerno alang sa pagpreparar sa mga kabataan aron mahimong mapuslanong indibidwal pag-abot sa panahon nga sila na ang mopuli sa atong mga katigulangan. Kulang pa ang pagmugna og mga programa ug mga balaod aron ma-protektahan ug ugmaron kining mga kabataan. Ug niini, dako ang papel nga gihawiran sa atong gobyerno.
Apan ang pinakadakong responsibilidad anaa sa kamot mismo sa mga ginikanan. Dili lamang ang kaugmaon sa mga bata apan ang tibuok nilang kinabuhi ang hawid sa matag ginikanan o pamilya. Ako nagtuo nga kining mga nag-unang problema sa nasud diin nalambigit ang mga bata ilabi pa diha sa druga, dili gayud mahitabo o mamahimong mapugngan lamang unta kung nahimong responsable lamang unta ang matag ginikanan sa ilang mga pamilya.
Kitang mga hamtong, kita ang angay nga motudlo sa mga bata. Sa pagsaulog karon sa National Children’s Month, hagit usab kini kanatong tanan nga mahimong maayong ehemplo sa katilingban kay kung unsa baya ang makita sa mga bata diha sa mga edaran, mao sab kini ang ilang sundon. Mao nga din a kita angay’ng matingala kung duna kitay badlungon nga mga kabataan kung kita mismo nagpabadlong sa atong katilingban.
Makalaom gayud kita nga adunay maayong kaugmaon ang nasud kung dunay maayong relasyon ang matag pamilya. Pamilya nga napuno sa pagpakabana, paghigugma ug panaghiusa.
RadyoMaN Misel Miral
