Davao City – Sa pagkatinood, husto gayud karon nga panahon aron i-evacuar na nato ang atong mga katawhang padayong nag-estar dinha sa mga kritikal nga mga lugar sama sa kadaplinan sa mga kabaybayunan, kasapaan ug kabukiran nga diin may history na nga either gibahaan ug gidahilian sa yuta.
Hagit karon sa kagamhanang lokal nga tinod-on gayud ang pagpabalhin sanglit ang kapakyas nato nga depensahan ang tawo gikan sa katalagman makonsidera man usab nga dakung pagpabaya kun negligence sa mandato nga ipahimutang gayud ang kaayuhan sa mga lungsuranon labaw sa nga tanan.
Aduna gayuy dili mosanong kun mosupak sa maong aksyon sa kagamhanan apan dili kini angay mag-diskorahe sa syudad nga buhaton ang angay buhaton.
Dili na nato mistil pa nga ipangandakan nga dili kita susceptible sa mga kalamidad: Ang kamatuoran mao nga dili na kita exempted pa sa pagbaha kun flashflood or pagdahili sa yuta kun landslides or makusog nga pagtay-og ba kaha sa atong kayutaan.
Kun kaniadto ang Davao Region luwas ‘ta sa mga bagyo, karon dili na: Ang atong eksperyensya nagpamatuod lamang nga wala na karoy rumbo ang trahedya, ma-Luzon ka man, ma-Visayas ka man or ma-Mindanao – ang tanan mamahimo nang hurawon ug hasolon sa grabeng mga calamities.
Angay lamang gayud seguraduhon sa gobyerno lokal man o nasyunal nga sa matag higayon nga atong demolisahon ang gambalay sa mga pobre natong kaigsoonan, aduna silay klarong kabalhinan gilayon ug dili kay pasagdan lamang sila diha sa kadalanan uban sa ilang mga nadislokar nga mga pamilya’g kabtangan nga makaluluoy kaayo kay maskin lugaw na lamang or init nga kape wala silay natagamtaman sama sa mga apektado sa Barangay 40-D kagahapon.
Dili man seguro mansyon ang ilang padulngan, ang importante mao nga aduna lamay disenteng tabon sa ilang mga ulo gikan sa init ug ulan ug haduol sa mga panginabuhian aron sila makalahutay kun maka-survive sa mga hagit sa kinabuhi.
RadyoMaN June Duterte
