Davao City – Gumikan sa paghugop sa katawhan diha sa kadalanan aron mobyahe pauli sa atong yutang natawhan atol sa Semana Santa, mas maayo tingaling atong subling ipahinumdom ang pipila ka mga pasidaan aron hilway kitang mo-navigar padulong ug pabalik sa atong tagsa-tagsa ka mga nahimutangan:
Una, praktisa kining gentle reminders kun ikaw usaka driver: Check the following before hitting the road – ‘BLOW BAGETS’ kun break, lights, oil, water, battery, air, gasoline, engine, tire ug self kun ang kahitsas sa atong kaugalingon una pa man mogunit sa manibela.
Ikaduha, batasana kanunay ang mga prinsipyong ‘road safety through road courtesy’ haron kalikayan ang ‘road rage’ kun bangi tali sa mga motorista diin usahay mosangpot pa gayud sa dili kalikayang pagka-angin sa kinabuhi gumikan lamang sa yano kun simpleng walay pagsinabtanay samtang naglawig sa kalsada, sa usaka konprontasyon nga arang na lang ka walay hinungdan!
Mahinungdanon kaayo ang road discipline ilabi na pinaagi sa prinsipyong ‘road sharing’ diin ang matag driver kinahanglang andam mohatag ug higayon o espasyo sa kapwa-motorista aron kalikayan ang panagsungag sa ilang mga behikulo konsiderahon nga ang atong pagbyahe dili man hanap-patay kon dili hanap-buhay, ilabi na usab nga dili kini lumba kon dili normal nga paglatas sa atong kadalanan.
Ug ikatulo, dili na mistil pang ipahinumdom ilabi na ngadto sa mga Public Utility Vehicle kun PUV unit drivers ug operators nga gikinahanglang lehitimo ang ilang operasyon ug dili sila colorum kansang numero unong rekwisito mao ang ‘road worthiness’ sa ilang mga yunit ingon man sa ilang mga driver.
Hinumduman nato ang road crash sa Occidental Mindoro: Niadtong insidentiha, 19 ka kinabuhi ang nakalas, laing 20 ang naangol.
Dili usab nato hikalimtan ang lain pang bag-ohay pa lamang nga bangga tali sa usaka PUJ ug usaka pickup sa may Magtuod Talomo diin grabe usab ang damyos hatud sa maong trahedya.
Alang sa mga mobyahe karong semanahona, keep safe ‘ta pirmi, exercise extreme caution and always seek God’s tender travelling mercies to keep you and your family safe and sound in all your travels.
RadyoMaN June Duterte
