Davao City- Motoo ka ba, higala sa karma? Kana bitaw’ng pilosopiya sa kinabuhi nga kun unsa ‘tong imong gihatag sa kalibutan, laomi nga mobalik usab kanimo? Nga kun magpugas ka ug maayo, kahilway gayud ang mahibalik kanimo? Ug nga kun dinautan ang atong pagahimoon, daku ang purohan nga kita ra usab ang maunay sa atong giluwatang kabuang?
Ako nagtoo ko niana. Gani, kining nagapanghitabo karon sa atong kinaiyahan ug kalibutan ehemplo man sa kun unsa ang atong dangatan mag-agad sa atong binuhatan:
Kun kubkubon nato ang kabukiran haron manguykoy ta’g bulawan, pangandam na lamang nga sa tanto-tanto nang pagguba nato sa atong kalasangan, moabot gayud ang panahon nga ang yuta ra usab maoy motabon sa atong lawas sama sa mapait nga kasinatian sa mga nagmina ug oro sa Diwalwal sa Monkayo ug sa polusyon didtong dapita sa Marcopper mining sa Marinduque.
Nga kun atong pamutlon ang mga punoan sa kahoy ug kalasangan, moabot ang panahon dili na makaya sa kayutaan ang makusog nga bundak sa ulan hinungdan unya sa grabeng pagdahili sa yuta kun landslide ingon man pagdahunog sa tubig-baha nga maoy mo-wipe out sa entero komunidad sama sa nahitabo sa mga dapit sama sa Ormoc, Leyte sa kapanahunan ni Supertyphoon Yolanda, sa pagtay-og sa Bohol, sa Mexico, China, Japan ug asa pang dapita sa kalibutan.
In my editorials, I have always echoed a constant reminder gani maora na ko’g ‘sirang plaka’ sa pagpahinumdom natong tanan nga sa bangi tali sa nag-wild nga kinaiyahan ug tawo, pilde gyud kitang tawo sa tinood lang.
Hulaton pa ba nato nga mahitabo ang sunod nga Cherry Hills tragedy didto sa kaulohan apan denhe na sa Davao pananglit diha sa may Shrine Hills sa Diversion Road?
Hulaton pa ba nato nga mokunsad na unya denhe ang makusog nga linog diin daghan ang makabsan sa kinabuhi gumikan sa atong kapakyas nga panalipdan ang kinaiyahan?
Daghan ta’g mamahimong buhaton, sugdan nato pinaagi sa pagtawag sa atensyon sa atong mga anaa sa pamunuan nga hugot ipatuman ang kun unsa man ugaling angayang ipatuman. Sugdan nato sa pagpasidaan kanila nga mamahimong magsugod sila diha sa strict enforcement sa atong tagsa-tagsa ka mga zoning ordinances ug sa atong National Building Code of the Philippines ug uban pang importanteng mga balaud sa nasud.
RadyoMan June Duterte
