Davao City – Ang tawo maoy nagapabarug sa gobyerno, ang gobyerno gitahasan usab nga ibalik ngadto sa tawo ang tanang kahinguhaan ug benepisyo aron tawhay ug hamugaway ang atong pamuyo sa katilingban.
Sakit lamang palandongon nga sa matag higayon nga buot natong pauswagon ang atong kinabuhi, didto gilayon kita modangop sa pagkuha ug buhis sa tawo.
Wala na bay laing pamaagi sa pagpa-asenso sa atong republika gawas sa pagsangun ngadto sa atong mga abaga sa pagpabarug sa istruktura sa atong estado?
Matuod nga aduna kitay tagsa-tagsa ka mga responsibilidad diha sa atong mga komunidad apan angayang maki-angayon kun ‘equitable’ kini. Kun si kinsa kadtong adunay dakung kapasidad nga mohatag, mao kadto sila ang angay hatagan sa mas dakung gibug-aton sa buluhisan sibo sa ilang halapad nga katakos.
Mientras ang mabagang duot sa katawhan angay nga malikay sa dautang epekto sa bisan unsang pagsutoy sa buhis nga klaro usab kaayong moresulta sa pagsaka sa presyo sa mga nag-unang palaliton ug serbisyo sa atong merkadohan.
Angayang tutukan sa gobyerno kadtong pagkolektar sa ensaktong buhis sa mga dagkung negosyante, kadtong pudyot lamang nga por ciento sa atong populasyon kinsa maoy nagkamar ug dakung ginansiya ug buhong sa kwarta inay nga kitang mga yano.
Angay usab ipunting sa estado ang iyang focus diha sa pagpukan sa korapsyon sa kaban sa nasud sanglit kini man ang tinood nga virus kun parasite o kagaw kun kanser nga mokutkot sa kahimsog sa atong panudlanan.
Ako nangandoy sa usa ka matang sa panggobyerno nga dili mahadlok motomar ug maisogong aksyon pabor sa tawo sama sa pagpaubos sa presyo sa mga palaliton, pagpasaka sa panuholan sa mas arangan nga ang-ang ug ang pagtugyan sa mas daghang kahigayunan sa pagpangempleyo dili lamang sa kasyudaran kon dili lakip usab didto sa kabukiran.
Unta moabot ang panahon nga ang gobyerno dili na mamerhuwisyo sa tawo pinaagi sa pagpangita’g mga tinubdan sa pondo gawas sa buhis aron ang mabagang duot sa yanong lungsuranon makalingkawas na gikan sa pagka-ot ot ug pagda-os os sa klase sa iyang pamuyo.
Gitawag kini sa uban nga ‘utopian dream’ kun usaka ideal society sama sa ‘Camelot’ sa atong literatura, laktod pagkasulti, damgo ug daman lamang.
Apan dautan ba diay nga kita mangandoy sa susamang matang sa katilingban diin ang walay ikasarang ug way igong katakos dili na palisud-lisuron hinonoa tabangan sa gobyerno nga lig-ong makabarug alang sa usaka disenteng matang sa kinabuhi?
RadyoMaN June Duterte
