Davao City – Kining latest nga mando sa gobyerno nga pagpa-recalibrate sa metrohan sa mga taxi units sa nasud ni-ani karon ug suporta sa pipila apan adunay mas daghang gibati’g tumang kasuko ning maong aksyon sa tinood lang.
Gani, atong nasayran gikan sa mga kasaligang tinubdan nga ubay-ubay nga mga taxi drivers naglusad na ug signature campaign aron kumbensihon ang Land Transportation Franchising and Regulatory Board (LTFRB) nga bakwion kini nga labing ulahing hukom.
Segun sa atong mga nahinabing taxi driver, daw waay sa gihapon ang increase sa pletehan gumikan kay nitaas man usab ang ilang boundary kun bayronon sa operator gikan sa P1,140.00 ngadto sa P1,340 na kun usbaw nga P200.
Alang nako, dili kini makatarunganon nga aksyon gumikan kay bitbit niini ang daghang mga witik: Una, giigo niini ang mga commuters kun sumasakay kinsa way kapaingnan kon dili ang pagsakay na lamang gayud ug taxi ilabi na kun nagdali sa ilang mga lakaw.
Ikaduha, klaro pa’s tanang klarex nga dili driver ang ni-ginansiya kon dili ang operator kinsa dawat-limpyo lamang kay ispoko mo na nga driver na man hinoon ang gipa-abaga sa kalisud pinaagi sa pagkawat sa dugang unta nga alibyo sa kinitaan niini, wa pay labot sa realidad nga matag higayun nga malambigit sa traffic violations ang naggunit sa manibela, ang driver maoy mobayad pinaagi sa pagkibra sa multa sa ilang inadlaw-adlaw’ng kinitaan nga gamay nang daan.
Ako nagtoo nga panahon nga seryosong tun-an sa kagamhanan ang mga palisiya o pamaagi haron mapanalipdan ang mga driver gikan sa pagpasulabi sa mga operator kinsa ginansya ray gihunahuna bahala na’g unsaon pag-eskrima’g maayo sa pobre uyamot intawon nga trabahante.
Gani ako mosugyot nga panahon nang tun-an kining sistemang binulan nga suholan inay nga boundary system lamang sa mga driver haron mas relax sila sa pagpamasada inay nga mowadwad ug husto nga gani ang uban mag-24 oras na lamang haron maka-boundary apan mas bulnerable na hinoon sa disgrasya.
Ug ngadto sa mga operator, undanga na nang inyong pagpasulabi sa mga yanong driver kay luoy na gani daan, ato pa gyung dut-an!
RadyoMaN June Duterte
