Davao City – Walay dautan sa usbaw sa pletehan karon sa mga taxi ug PUJ units sa entero nasud sanglit mugna ug nilugdangan lamang kini sa sunod-sunod usab nga pagsaka sa presyo sa petrolyo, dugang bag-ong buluhisan ug sa ‘chain reaction’ niini diha sa basic and prime commodities and services.
Apan unta adunay kaakibat kun tupad o tugbang usab nga remedyo o bin ba kaha alibyo sa parte sa mga sumasakay nga unta ihikutar kun hugot ipatuman usab sa gobyerno.
Usa dinha mao kining pagseguro nga ang mga public utility drivers dili gayud mamili ug pasahero kay kitang riding public andam man usab mobayad ug ensakto ug nga kita baya mao may nagbuhi kanila, dili ba?
Unta wala nay mga taxi ug PUJ drivers ba nga arang na lang ka supakero, pilian ug pasahero, bastos pa gyud ug dili maayo ug pamatasan.
Unta hugtan pa’g maayo sa estado kining maanindot nga programang ‘Oplan Isnabero’ bitaw haron mahurot na’g kadakop kining mga salawayong driver nga kun di gani pabor ang destinasyon sa pasahero, dayo’g balibad kay kuno ka-ihion na, maghatud pa kuno ug anak sa eskwelahan, mo-car barn kun mo-garahe na o bisan unsa na lang intawon nga alibi.
Usahay makiglalis pa gyud sa pasahero hinikalimtan nga ang ilang mandato mao nga manerbisyo sa publiko – nag-driver pa mo!
Ako usab nanghinaut nga wala nay pasahero nga mabalibaran diha sa kalsada ilabi na panahon sa kusog nga bundak sa ulan or bin ba kaha rush hours sa buntag or sa kahaponon ba kaha.
Otherwise, kun magpadayon kining mga mapait natong kasinatian sa kamot sa mga tamba-el-el nga mga naggunit sa manibela, nah dili na gayud nato tingali madid-an kun mapugngan pa ang tawo nga didto na lang mosuporta sa maanindot kaayong laraw ni Mayor Inday Sara nga ‘High Priority Bus System’ denhe sa atong dakbayan.
At least kun bus system na ‘ta, I believe regulated na kini diha sa aspetong fare rates ingon man depensado na kitang mga yanong lungsuranon nga mga sumasakay gikan sa sobrang ka-traffic kun kahu-ot dala sa way disiplinang loading-unloading sa mga public utility vehicle drivers ingon man tawhay na unya ang atong inadlaw-adlaw’ng dagan sa pampublikong panakayan, hopefully.
RadyoMaN June Duterte
