Davao City – Karong adlawa, ma-exercise na usab natong katawhan ang atong sagradong katungod nga mamili sa mga opisyales nga magrepresentar kanato diha sa pinaka-basic political unit: Ang barangay.
Anaa sa atong mga kamot, anaa sa tumoy sa atong mga ballpen ug balota ang atong kaugmaon: Ihatag ba nato ang oportunidad sa pagpanerbisyo ngadto sa mga kandidatong ‘deserving’ kun angayan sa atong boto ug pagsalig o atong ibaylo ang maong talagsaong kahigayunan sa 30 ka plata gikan sa bentahosong pulitiko?
Ato bang gamiton kini nga higayon sa pagbotar alang sa pag-usab sa dagan sa atong nasudnong pamulitika pinaagi sa pagbasura sa ‘traditional politics’ ug paghatag ug igong bili ngadto sa bag-ong matang sa mga lideres kansang kasingkasing anaa sa hustong posisyon?
Kun lili-on nato ang progreso sa mga nagmalamboong demokrasya sa kalibutan, dili ikalalis ug tino gayud nga usa sa dakung factor sa ilang kalamboan mao ang klase sa ilang governance kun panggobyerno.
Kun ang katawhan mohugop diha sa botasyon ilawom sa prinsipyong ‘active citizenship’ ug mosalmot diha sa pagpahimsog sa atong kadumalahan, dili halayo ang posibilidad nga atong masinatian ang matuod gayud nga kausaban ug progreso.
Ug kun seguraduhon lamang sa matag botante nga ang ilang pagapilion mao lamang kadtong kandidatong adunay igong katakos, kaligdong, moralidad ug espiritwalidad ilabi na kahadlok sa Kahitas-an, ang atong pag-uswag atong gayud nga ma-ekperyensyahan.
So let us vote wisely and let our consciences dictate our choice of leaders and governors!
RadyoMaN June Duterte
