Davao City – Ang atong nasudnong kumbate batok sa mangtas nga droga nga makabuang sa pangutok ug pangisip sa tawo, makaguba sa relasyon ug pamilya ug maghatud sa entero nasud sa bung-aw sa kaala-otan nagbarug diha sa kalig-on sa mga sektor nga nagalihuk sa kampanya kontra narkotiko.
Kun mag-inday inday kita, kun magpaka-walay keber kita, kun dili moganar ang makinaryas sa gobyerno diha sa pinaka-ubos nga lebel sa pangobyerno nga mao ang kabarangayan, dili nato ikatingala nga padayong molipang ug mosi-aw ang droga diha sa atong kabarangayan, diha mismo sa atong nataran o tugkaran.
Kun dili nato kini sila giyerahon, kita ang ilang pildihon. If we do not kill illegal drugs, drugs will definitely kill us – especially the youth of the land.
Ug kun inay magsilbi nga role models sa pagkamatarong ang mga kapitan ug kagawad mao na man hinooy tigpayuhot, tiggamit ug tigpanalipod sa droga, klaro na gayud nga impyerno ang naghulat kanatong tanan.
Dili kana nato tugtan: Ang pinakadakung hagit karon sa tanang mga stakeholders – kabatan-onan, eskwelahan, gobyerno, kasimbahanan, komunidad ug pamilya – mao ang paghiusa sa atong kusog haron makaya natong buntugon ang demonyo nga shabu ug uban pang matang sa droga.
Hugtan pa nato’g maayo ang ato nang nakab-ot nga mga kadaugan, dili kita molurang sa atong kaaghop sanglit kaugmaon sa sunod natong mga kaliwatan ang anaa karon sa malisud ug delikadong kahimtang. God bless the Filipino family!
RadyoMaN June Duterte
