ARCHER CAPADESO
Program Director
SA pinulongan sa mga teenager, “ang haba nang hair mo te”. Si Gov. Angel Amante- Matba sa Agusan del Norte bisitahun gyud ni Pang. Rodrigo Duterte karong adlaw’ng Sabado. Natunong kini sa iyang State of the Province Address (SOPA). Si Digonhg maoy bisita sa People’s Day, usa ka selebrasyon niining kasaulogan sa kasumaran sa lalawigan. Ingun ana ka lakas sa dughan ni Digong si Iyay.
Unsay resulta sa pagbisita sa Pangulo? Maghatud kini’g garbu ni Gov. Angel kay sa kadaghang nangandoy nga makabatun sa presensya sa Pangulo, si Gov. Angel lang ang sayun kaayu maka-imbita kaniya.
Pangulo man ang mobisita, makigtagbu kaha niya si Mayor Katrina Mortola kay didto man sa Cabadbaran city ang aktibidad? Makit-an kaha didto si Cong. Erlpi John Amante? Dulot sa bukog ang dumot ug away sa duha ka igsoon, apan kay Presidenti man ang mobisita daku ang posibilidad nga magpakita ang Mayor ug ang Kongresista agig kortesiya.
Kung si Gov. Angel lang ang magpahigayun ug SOPA, bisan buhok ug anino siguradong dili Makita sila si Cong. Erlpi ug Mayor Kat.
Unsay kaayuhan nga dala ni Digong sa iyang pagbisita? Ang Suma Total gusto maminaw kung mamulong si Digong kay tingale’g mosaad siya ug proyekto alang sa Agusan del Norte. Basin diay ug mosaad siya nga taposon na ang wala mahuman nga Kapitolyo, o basin diay ug motabang ang Pangulo alang sa pagpalambo sa serbisyo nianang barut nga Provincial Hospital. Tingale maka hunghung si Gov. Angel kang Digong nga tabangan siya sa maong mga problema ug dili gyud usikan niya ang talagsaong kahigayunan nga maatubang ang Pangulo. Kung mag-request ug proyekto pinaagi sa papel, katulgan lang ang tanan kay moagi paman sa daghang mga opisina nga maoy kasangitan apan lahi kung naharung gyud ang Pangulo basin tulin pa sa alas 4 ang pagtubag sa pangayu-ong proyekto.
Kung ang gipangandoy sa pagbisita sa Pangulo mao ang pag-uli unta sa maayung relasyon sa magsoon, imposible kay garbu naman ang nagpatigbabaw sa duha. Daghan man pod ang nalipay nga nag-away ang magsoon ug kini sila maguol pa kung mag-uli ang duha kay mawad-an man pod ug trabaho isip mga torotot. Ang away sa pulong ni Angel ug ErlpiE milahus hangtud sa ilang tagsa tagsa’ng mga torotot ug kung mag-uli ang duha unsa pama’y trabaho sa mga torotot?
Wala kita mag-apas sa panag-uli sa maayung relasyon sa duha. Bahala sila ug magdumot hangtud sa hangtud ang importanti makatilaw ang mga tawo sa mga proyekto ug maayung serbisyo nga unta matuman sa pagbisita sa Pangulo.
