General Santos City—Angol ang usa ka Sundalo nga si Private First Class Stephen Omar Arandillo, residenti sa Zone 2, block 10, Barangay Fatima Gensan ug kasamtangan nakabase sa lake Sebu South Cotabato human nga naigo matud pa ug kilat alas 8:00 ang takna kagabie samtang kini anaa sa ilang kampo sa may Sitio Abokado, Barangay Paciman, Lake Sebu.
Sa impormasyong nahagpat sa RMN Gensan gikan sa Dr. Jorge Royeca Hospital nasuta nga nagtan-aw matud pa ug Video ang biktima uban sa iyang mga kaubanan samtang sila anaa sa ilang kampo apan kalit lang matud pang mikilat dungan sa pagbundak sa ulan, naigo ang biktima sa iyang lawas nga hinungdan kini nakuyapan.
Gilayon man nga gidala sa iyang mga kaubanan sa pinakaduol nga hospital didto sa maong lugar apan gibalhin ang biktima sa Dr. Jorge Royeca Hospital dinhi sa Gensan sakay sa ambulansya sa lungsod sa Lake Sebu.
