Davao City – Patong-patong nga mga kaso ang atubangon sa sundalo ug rebel returnee human kini pagpabuto’g armas ug nangulata’g civilian niadtong kapaskuhan sa may Prk. Bougainvillea, Brgy. Lucod, Baganga, Davao Oriental.
Segun ni Davao Oriental Police Provincial Director PSSUPT Marcial Magistrado nga ilaha ng gipasang-at ang kasong Serious Physical Injuries, Grave Threats, Illegal Discharge of Firearm ug Violation of Domicile sa Prov’l Prosecutor’s Office sa Mati City, Davao Oriental batok sa mga suspek nga sila PFC Junifort Agustin sakop sa 67th Infantry Batallion Philippine Army ug Marlon Damaso Dela Torre usa ka rebel returnee.
Sumala sa PNP nga ilaha pang giproseso para sa regular filing ang kasong may kalapasan sa R.A. 10591 samtang kay ginapaabot pa nila ang certification for firearms verification gikan sa office of the Firearms and Explosives Division.
Kahinumduman nga niadtong Disyembre 25, 2018 base sa spot report sa kapulisan nga ang mga suspek giingong gipangkulata ang mga biktima nga sila Jose Julian, 69 anyos, mag-uuma, Archie Bragat, 37 anyos, barbero ug William Maldo, 50 anyos ug nagpabuto ang maong sundalo sa iyahang baril.
Narekober sa nasangpit nga lugar ang .45 nga pistola, magazine ug mga bala nga maoy gigamit sa suspek.
Priso karon ang mga suspetsado sa Baganga Municipal Police Station.
RadyoMaN Aimee Guinita
