Sunfish nga pilason nakasampay sa baybayon sang Bacolod

54

Bacolod City – Isa ka tumalagsahon kag endangered specie sang higante nga isda ang nakit-an nga nagautaw-utaw sa baybayon sg Brgy. Banago, malapit sa daan nga pantalan pasado las siete sang aga, kahapon nga adlaw.

Suno sa nakasapo nga si Junel Pormento, 32 anyos, ini ang magapanagat kuntani, sakay sa iya motorized banca, apang sang ini ang mag labay sa amo nga area, didto kay iya nakit-an ang naga utaw-utaw nga daw ang higante nga isda.

Ginpalapitan ni Junel ang amo nga isda kag ini ang buhi pa, apang maluya na kag naga kaya-on. Guilayon nga ginhigtan ni Junel ang isda kag ginguyod pabalik sa manabaw nga bahin sg baybay, malapit sa mga minuro sang Purok Kitahanon, Brgy. Banago, kag gilayon nga ginpabalo ang Maritime Command kag Bureau of Fisheries Enforcement Unit ukon Bantay Dagat.

Sa pag-usisa sg Bantay Dagat enforcer nga si Vicente dela Luna Jr., didto kag nakilal-an nga ini ang isa ka ‘sunfish’ ukon bola-bola.

Ang ‘sunfish’ ang isa ka isda nga nagakabuhi sa madalum nga bahin sang kadagatan.

Sa estimated measurement sang Bantay Dagat, ini ang nagalaba sang mas o menus 4.5 ka tapak kag may kalaparon nga 5 tubtub 6 ka tapak, kag may kabug-aton nga gina bulubanta masubra sa 100 kilos.

May pila ka mga pilas nga nakit-an sa lawas sang amo nga higante nga isda, lakip na ang madalum kag malaba nga gisi sa iya idalum nga fins nga posible, amo naman ang gintunaan sang iya pagluya kag ‘inability’ sa pag langoy.

Indi man ma confirm sg Bantay Dagat, apang isa sa mga ginasuspetsahan sang mga aquatic kkag marine life experts nga basi naigo sang propeler ukon elisi sang sakayan pandagat ang amo nga isda.

Isa man sa palamangkotanon amo kun nga-a, ang isa ka higante nga isda nga yara lang makit-an sg mga madalum nga bahin sg dagat ang nagpahigad sa nabaw gani ini ang posible rason kun nga-a naigo sg propeler.

Pila ka mga superstitious beliefs ang naga lapta sa Prk. Kitahanon nga basta gani may mga talanhaga nga mga isda ang makit-an matapos ang linog, ini ang patimaan nga may masunod man nga ma baskog nga pag linog.

Apang ini ang gilayon nga gintapna sg mga marine life experts nga wala gid sg kamatu-oran ang ini nga pagpati.

Wala man nagkonpirma ang mga otoridad kun bala pwedi maka-on ang unod sg ‘sunfish’.

Facebook Comments