Sunod-sunod nga engkwentro tali sa AFP ug NPA , natigayon sa Quezon, Bukidnon

105

Natigayon ang sunod-sunod nga engkwentro tali sa New Peoples Army kon NPA ug Armed Forces of the Philippines sa Sitio Sinaylayan, Brgy. Menungan, Quezon, Bukidnon niadtong Biyernes, Oktubre 9, 2020 hangtod kagahapon.

Sa interview sa RMN Malaybalay ngadto kang Cpt. Rene Belmonte, ang Civil Military Operations Officer ug spokesperson sa 403rd Infantry Brigade, PA, gibutyag niini nga natigayon ang engkwentro tungod sa gihimo nila ang intensified focused military operation sa mao nga dapit human nga nakadawat sila ug sumbong gikan sa mga sibiliyan kalabot sa presensya sa mga NPA.

Matud ni Cpt. Belmonte nga ilang na-engkwentro ang mukabat sa 30 kapin kon kulang ka mga NPA.

Nagresulta kini sa pagkasamdan sa 1 ka sundalo human nga nabuthan ug landmine nga gibilin sa walhong grupo, hinoon anaa na kini sa luwas nga kahimtang.

Sigun ni Belmonte nga human ang unang engkwentro niadtong Biyernes, nagbulag-bulag ang 30 ka mga miyembro sa NPA ngadto sa 3 ka grupo ug ila na usab nga na-engkwentro ang 10 ka miyembro niini niadtong Sabado sa buntag.

Kagahapon, Dominggo, laing engkwentro na usab ang natigayon apan walay nasamdan sa tropa sa gobyerno.

Tungod sa engkwentro, adunay mga bakwit gikan sa Sitio Sinaylayan paingon sa Brgy. Hall sa Menungan.




Gisuta pa karon kon pila ka indibidwal ang apektado.

Sa karon padayon ang combat military operations sa mao nga dapit kung asa gigamit na sa military ang ilang mga air assets.

Facebook Comments