Sunod-sunod nga linog sa DavOcc ug DavOr natala sa PHIVOLCS

76

Davao City – Gitay-ug og sunod-sunod nga linog ang Davao Occidental ug Davao Oriental karong adlawa, Mayo 11, 2018.

Base sa report sa Philippine Institute of Volcanology and Seismology kun PHIVOLCS, tectonic ang tinubdan sa tulo ka managlaing linog nga natala sa Davao Occidental diin kaganinang alas 4:06 sa kadlawun, magnitude 4.7 ang mitay-ug nga adunay gilay-on nga 123kms sa sidlakang bahin sa Jose Abad Santos samtang 5.0 ang natala sa may sidlakang bahin sa Sarangani, Davao Occidental nga adunay 169 kms ang gilay-on.


Dugang niini, natala usab ang magnitude 3.0 nga linog diin tectonic usab ang tinubdan niini nga adunay 45 kms nga gilay-on sa sidlakang bahin sa Jose Abad Santos.

Samtang sa Davao Oriental, unang mitay-ug ang magnitude 2.8 nga linog ala 1:09 kaganinang kadlawun diin aduna kini gilay-on nga 52 kms sa sidlakang bahin sa Governor Generoso apan human sa pipila ka minuto, subling gitay-ug og linog ang nasangpit nga lugar og magnitude 3.1 ala 1:13 kaganinang kadlawun.

Kaganina lang hapon, alas 3:39, laing linog na usab ang natala sa PHIVOLCS nga mitay-ug sa Caraga, Davao Oriental nga mao ang magnitude 2.8 nga linog nga adunay 120 kms ang giladmon.

Sa report sa PHIVOLCS, walay laumang damyos ug aftershocks sa maong mga linog gawas lang sa magnitude 5.0 nga mitay-ug sa Sarangani, Davao Occidental nga posibleng adunay aftershocks.



RadyoMaN Renz Barbarona

Facebook Comments