CATBALOGAN CITY, Samar – Ginkalasan an mga residente ha Pier Uno, Brgy. 06, Catbalogan City, Samar han tigda nga paglarab han sunog, alas 2:30 han umagahon kakulop.
Haros ngatanan nga balay han mao nga barangay in ginkaon han sunog.
Ha interview han RMN kan PSupt. Doughlas Antonio Eloja, Chief Of Police han Catbalogan City, Samar, 300 nga pamilya an apektado han sunog.
Waray pa nagawas ha imbistigasyon han Bureau of Fire Protection kun diin ngan kun ano an hinungdan han sunog.
Alas 5:00 na han aga gindeklara an fire-out han BFP. Bumulig pa dinhi an mga firetrucks tikang ha mga bungto han Gandara, San Jorge ngan Paranas.
Dugang han opisyal, 6 million pesos an danyos han ngatanan nga mga gindestroso han sunog.
Waray naman nasamaran o namatay ha ha nahinabo nga insidente.
Ha pagka-yana, temporaryo nga nag-uukoy an 300 nga pamilya ha Evacuation Centers ha Catbalogan.
Samtang, gin-aasikaso na yana han Local Government han Catbalogan kun paunanhon mabubuligan an mga apektado nga residente.
