Malay, Aklan – Padayon pa makaron rong ginapatigayon nga imbestigasyon it Bureau of Fire Malay angot sa natabong sunog kabii maeapit sa tindahan it Brgy. Caticlan sa nasambit nga banwa.
Suno kay FSINSP. Lorna Parcillano rong hepe it BFP Malay nga nakabaton sanda it report nga may sunog sa lugar samtang idto man rong tropa sa Brgy. Nabaoy nag responde sa naga katabong grassfire.
Insigida sanda nga nagbalik para nga respondehan man ro report ag sa pag-abot nanda mabahoe man eon rong kaeayo bangud nga puro himo sa light materials nga mga baligyaan it uga, ballot, panakot , ukay-ukay ag may baeay sa likod rong naga kasunog kung sa siin umabot raya sa 2nd alarm.
Bangud kara hay nagpangyo sanda it apuya sa mga bombero it kaeapit banwa kamana kung Buruanga, Ibajay ag sa TransAir.
Nag responde man rong bombero it Numancia, Kalibo ag iba pang mga fire trucks ag volunteers it banwang Malay.
Nag bueoligan man ro mga residente sa lugar agod nga mapaeaong rong kaeayo.
Base sa imbestigasyon nag umpisa rong sunog mga bandang alas 9:17 ag na fire under control mga 10:05 kabii.
Samtang sa pakikipag-angot man kay Punong Barangay Ranie Tolosa nga sa may bangdang tunga nag umpisa rong sunog nga maisot pa eang ag napaeong rato sa bulig it mga residente ugaling bangud sa mabaskog rong hangin ag madali duktan hay uman nga nagkaeayo ag madasig eon nga nag eapta.
Sa makaron hay uwa pa masayuri kon ano gid ro ginhalinan it kaeayo nga tumupok sa more or less 6 ka mga stalls ag may nadamay nga baeay kamana man kon pila rong danyos.
Ro nasambit nga area hay gina-agyan pasueod sa tindahan it Caticlan kung sa siin naga ikit-ikit man rong mga panimaeay ag establisyemento.
