BACOLOD CITY – Gintupok sang kalayo ang isa ka puluy-an sa natabo nga sunog sini gid lamang nga aga sa Felisa Road, Brgy. Mansilingan, Bacolod City.
Suno kay Bacolod City Bureau of Fire Protection Head F/Cinsp. Publio Ploteña ang amo nga balay nga nahamtang sa Purok Kasilingan Uno, Felisa Road, Brgy. Mansilingan kag ginapanag-iyahan ni Rosita Puerta, 78 anyos ang edad.
Base sa inisyal nga pagpangusisa sang BFP kag suno sa mga kaingod, may nalipatan nga nakasindi sa sulod balay apang indi pa matumod kon bala ini ang kandila ukon kingki.
Wala naman sang may ginreport nga nasamaran ukon nahalitan sa amo nga sunog kon diin wala na ini naglapta pa bangud may pader ang palibot kag sementado ang mga balay nga yara sa tupad sini.
Sa karon padayon nga gina assess ang kahalitan sang amo nga sunog apang base sa inisyal nga pag-usisa ini ang nagtuga sang halit nga kapin 100 mil pesos, more or less./dyHB BACOLOD
