Halos molanat na ug napu ka oras ug bisan way tulog, nagpadayon pa gihapon ang pagpakigkumbati sa mga bombero sa pagkasunog sa Gaisano Metro sud sa Ayala Center –Cebu sukad pa kagabii.
Usa sa gilisdan sa mga bombero sa pagsud dayon sa department store mao ang kabaga ug kakusug sa aso , hinungdan nga nigamit sila ug mga breathing apparatus sa pagkombati sa kayo .
Ang Cebu City Fire Marshall nga si Fire Chief Inspector Noel Ababon nitataw nga ang kayo na-confine lang sa department store sa Metro Gaisano ug wa maapektohi ang ubang mga tindahan sa Ayala Mall .
Ang baga kaayo nga aso unang namatikdan sa stockroom sa mga duwaan sa third floor sa building pasado alas 9:00 kagabii hinungdan nga daling gipabakwit ang mga empleyado sa tindahan.
Mingaw na usab ang tindahan sa pagsugod sa sunog tungod kay padung nang manira ang tindahan .
Pinaagi sa ladder truck sa Bureau of Fire Protection, gibuak sa mga bomber ang pipila ka bahin sa bungbong sa building aron makagawas ang nagpoot nga aso.
Ang sunog padayong giisa sa Task Force Alpha.
