Ramon Magsaysay, Zamboanga del Sur – Gisungag sa nagsunod nga Rural Bus ang nagdagan nga pampasaheroang Super 5 Bus sa National Highway Purok 2, Barangay Esperanza, Ramon Magsaysay, Zamboanga del Sur alas 5:40 kagahapon sa hapon.
Sa imbestigasyon nasayran nga samtang nagdagan ang Super 5 Bus, color puti, gikan sa dakbayan sa Pagadian paingon sa syudad sa Ozamis nga gimaneho ni JAREL NUCOM DACANAY, 40-anyos taga-Molave, niining probinsya kalit kining gisungag sa nagsunod nga Rural Bus, nga gimaneho ni JENNIFER ALQUIZA BARAN, 42 residente sa Purok 6, Brgy. Lanipao Lala, Lanao del Norte diin sakay ang siyam ka mga pasahero nga pulos taga Brgy. Tinago, Ozamis City.
Sa ulahing imbestigasyon sa kapulisan nasuta nga ang Super 5 Bus kalit nga nitamak sa iyang brake aron makalikay sa laing sakyanan nga nag-una hinungdan nga ang nagsunod Rural Bus nakalitan nga niresulta sa panagbanga.
Ang pipila ka mga pasahero sa Rural nga naka-angkon sa dyutang bun-og sa lawas daling gidala sa Blancia Hospital, Molave, Zamboanga del Sur alang sa dinalian nga medikasyon.
