LA CASTELLANA – Ginpasidunggan kagab-i si Mayor Rhumyla Nicor Mangilimutan sang banwa sang La Castellana bilang Most Outstanding Mayor sang SuperBrands – isa ka international award giving body.
Ginpahayag ni Mr. Kenneth Rocete, Marketing Director sang SuperBrands nga si Mayor Mangilimutan ang ika-duha nga alkalde dire sa Western Visayas nga nakabaton sang kasubong nga award, una diri si Mayor Jonathan Tan sang Pandan, probinsya sang Antique.
Suno kay Rocete nga ang balasihan sang pagpasidungog amo ang maayo nga hinimuan sang alkalde agud mag-uswag ang iya banwa, wala ini sang ginapangatubang nga kaso sa Ombudsmen, inde imbolbado sa druga kag mga iligal nga mga hilikuton.
Sa pihak nga bahin ginkalipay naman ni Mayor Mangilimutan ang amo nga pagpasidungog sa diin bilang pinakauna nga babaye nga alkalde sang La castellana wala ini nagdahum nga matalupangdan sa international nga level ang iya pagpangabudlay agud mapatin-ad kag makilala ang iya banwa.
Suno pa sa Alkalde nga makaduha sya ka beses nakabaton sang sulat gikan sa SuperBrands, una sadtong bulan sang Oktobre 2017 apang ginpabay-an nya ini bangud wala naman sya sang nahibal an tuhoy sa sining awarding giving body, apang sang liwat ini nga nagsulat diri na kag iya ini ginbalusan.
Dugang pa sang alkalde nga wala gid ini nagdahum nga mapasidunggan bangud una pa gid lamang ini nga termino sang iya pagpangalagad sa banwa sang La Castellana.
Ginpangako naman ni Mangilimutan nga iya tinghuwaan nga mas mapasanyog pa gid ang La Castellana samtang sya ang nagapangalagad bilang alkalde. / Grace Supe
