Davao City – Dako ang pagpasalamat ni Pio Reo, 52-anyos, amahan ni Carlo Paalam sa suporta nga gihatag sa Local Government Unit (LGU) sa Cagayan de Oro (CDO) sa boxing career sa anak hangtud sa iyang dula karon sa 2020 Tokyo Olympics.
Sa interbyu sa DXDC RMN Davao kang Pio Reo, gisaysay niini nga bugtong si Carlo lamang sa iyang mga anak ang nagka-interes sa boxing diin ubay-ubay na usab ka local ug international competition ang naapilan niini ug nag-uli og mga medalya.
Mensahe sa amahan ngadto sa anak nga kanunay’ng musangpit sa Ginoo sa iyang padayong dula labi na sa Finals karon sa Olympics ug kanunay’ng magpasalamat sa misuporta kaniya.
“Ang akoa lang ikasulti sa akong anak nga ‘Anak, amping always unya padayon nga pag-ampo ug ayaw kalimti ang imong mga supporters ug labi na sa atong nasud sa Pilipinas,” mensahe sa amahan.
Makalaban sa Pinoy Olympian si Galal Yafai sa Great Britain ala-1 karong hapon ug naglaum ang pamilya ug tanang supporters nga mauli ni Paalam ang ikaduhang bulawang medalya sa Olympics sa nasud.
RadyoMaN Kirby Manzon
