Suspechao irido despues tira el pulis

12

Con un persona quien ta enfrenta reclamo de acto de chuchinadas ya sopla de tiro el pulis del Sta. Maria Police Station despues este ya imbisti canila mientras ta precura sila aresta con este na Poste Drive, Pasonanca del Sabado por la noche.
Con el suspechao ya conose como si Albert Teres, 38, anios de edad y del mencionao lugar.
Asegun na report del pulis antede sosede el tiroteo, alas 8:30 del noche del Sabado si Claire Francis Agustin, 21 anios de edad hunto consu hermana menor si Jasmine ya hace el reclamo na estacion del Sta. Maria police station que asegun mientras ta bende sila gulay serca na diila residencia na Villa Sta. Maria derepente ya lang ya abuya si Teres y ya besa na pescueso con su hermana si Jasmine, alas 8 del aga pa.
Dayun ya conduci follow-up operation el maga pulis del Sta. Maria Police Station na Poste Drive, Pasonanca donde ya puede estos aguanta con Teres.
Pero ya precura imbist si Teres y ya pipina este palo y ya sopla n acara con Police Executive Master Sargent Veloso uno del maga responding policemen.
Y despues ya corre si Teres para na Villa Sta. Maria pero ya puede conele hace apas si Corporal Noel Kalam y ya pichi conele.
Pero ya aranca tamen tiheras si Teres y ya lancia con Kalam na bariga.
Aqui deste, ya tene ya que sopla de tiro conele na pies el otro pulis para hinde mas le puede pa imbisti.
Con Teres y coneldos pulis ya lleva na hospital para dale el tratamiento medical.
Mientras el maga pulis ta prepara ya tamen maga caso que ay planta contra con Teres na corte.

Facebook Comments