Suspect nga namusil sa duha ka batan-on sa samal, gikalisdan pa og pangita sa otoridad

Davao City – Gihuptan gihapon sa pamilya sa duha ka batan-ong gipusil-patay sa Brgy. Camudmud, Samal, Davao del Norte niadtong June 23, 2024 ang paglaom nga makuha nila ang hustisya sa kamatayon sa mga biktima.

Sa pakighinabi sa DXDC RMN Davao kang Mariemor Del Campo, igsuon sa 15 anyos nga biktima, wala pa silay nadawat nga update o kalambuan sa maong kaso.

Samtang gibutyag ni Police Regional Office (PRO) XI Spokesperson Police Major Catherine Dela Rey atol sa AFP-PNP Press Conference niadtong June 26, 2024 nga wala pay matumbok nga suspect sa krimen tungod usab sa pagsuot sa gunman og mask ug bonnet ug ang giingong pagsibat usab sa tinuod nga target.

Kahinumdoman nga gipusil si Alyas Jack ug Alyas Dan sulod sa computer shop human matud pang naalaan ug nadamay sa pagpangawat og kanding sa ilang lugar.

Sa karon, nagpadayon ang pagsuta sa kapulisan sa Samal sa CCTV footage ingon man sa pagpangita og uban pang testigo aron masulbad ang maong kaso.

RadyoMaN Ivy Parido