![WEBSITE-18-×-10-in-49.jpg](https://i0.wp.com/rmn.ph/wp-content/uploads/2024/07/WEBSITE-18-×-10-in-49.jpg?resize=696%2C387&ssl=1)
Sa exclusive interview sa DXDC RMN Davao kang Maricel Ramil, inahan sa 15 anyos nga biktimang si alyas Mimi, dili sya makatuo nga ang live-in partner sa iyahang anak nga si Junjun, 20 anyos ang maoy suspect sa pagpatay sa manghud niini.
Matud sa inahan, gisugo pa niya ang suspect ug mitabang pa kini og pangita sa iyahang anak partikular na sa abandonadong balay asa nakit-an ang tsinelas sa biktima.
“Wala ko naghuna-huna nga ingon ana (ang mahitabo) kay syempre suod na sya sa among pamilya. Two years na man yata na sila diri sa amoa. Unya pag-abot sa tag-iya (sa abandonadong balay), among gi-check didto sa sulod unya nakit-an namo iyang gisuot nga short ug mga dugo. Nakit-an nako iyang tiil unya paggawas nako, niana man sya (ang suspect) nga pusasi ko ninyo,” saysay sa inahan.
Sa pagkakaron, ginalataw sab ang posibilidad nga gihilabtan sa suspect ang biktima human nga wala na kini sapot sa dihang kini nakaplagan. Giangkon matud pa sa suspect nga iyahang gibunalan ang dalagita.
“Ipapriso nako siya. Dili nako siya pagawason gyud. Bahala siya. Bayaran niya ang gibuhat sa akong anak. Wala man unta ‘mi sala niya. Gitarong pa gyud namo sya’g dala. Giila pa gyud namo siya nga anak na gyud ang among turing sa iyaha,” sulti sa inahan.
RadyoMaN Kirby Manzon