TACLOBAN CITY – Nagdumara hin entrapment operation an operatiba han Tacloban City Police Office ha usa nga lodging house ha Tacloban City, kakulop.
Usa nga gin-aaligar suspek han panlugos an naaresto han mga otoridad, ini in ginkilala nga hi Farroq Espero, ada na ha sakto nga pangidaron ngan residente ha Brgy. Anibong, Tacloban City.
Nagsumat an usa nga 17 anyos grade 11 student nga babayi nga hiya in ginlugos dida han Oktubre 28 ha sakob han lodging house ha Del Pilar Street.
Basi ha inisyal nga imbistigasyon han mga otoridad, an biktima nga igtatago nala namon ha ngaran nga Sarah in mayada komunikasyon ha suspek pinaagi han facebook, usa nga social media application.
Aminado an biktima nga mayada hira relasyon han suspek matapos an pira kasemana nga hira in nag-iistorya pinaagi han facebook, pero hiya in nag-insister nga diri seryoso an ira relasyon.
Sumala han biktima, hiya in gin-uwat han suspek tungod nga an profile picture han suspek ha facebook in usa nga handsome hunk model pero nahikalasan hiya han nagkita na hira ha personal.
Dugang pa ha pamahayag han biktima, syahan hira nga nagkita dida han Okubre 28 ngan gin-aaligar pwersahan hiya nga ginpa-upod ha usa lodging house kun diin nahinabo an insidente.
Matapos an insidente, waray daw kakontento an suspek, naghulga pa ha biktima nga iya daw igpapakalat an screenshots han maglaw-ay nga conversation ngan nude photos han biktima ngadto ha iya kamaistrahan ngan principal kun tatapuson niya an ira relasyon.
Kakulop, nagsabot an biktima ngan an suspek nga magkikita utro hira ha usa nga lodging house ha Burgos Street.
Didto na nahinabo an entrapment operation han Tacloban PNP kun diin naaresto an suspek.
Ha interview han RMN, ginpanhimuwa han suspek ini nga akusasyon nga iginlalabay ha iya han biktima.
Basi han ginhatag nga report han Tacloban PNP, mayada na kaso nga direct assault an suspek nga ginfile ni anay Brgy. Anibong Chairman Noel Tabao.
Yana, maatubang an suspek hin mga kaangayan nga kaso.
