General Santos City—Patay ang usa ka Danilo Gutierez, legal age, residenti sa Sunrise Subd., Barangay Poblacion, Polomolok, South Cotabato human kining misukol sa kapulisan atol sa gihimong search operation sa Polomolok PNP kaadlawon adlawng Domingo, Dec. 16, 2018.
Sumala ni Police Supt. Samuel Cadungon, Hepe sa Polomolok PNP nga kaabag nila sa maong operasyon sa mga personahe sa PDEA-12.
Nasayran nga ang ronda pinasikad sa search warrant nga gipagula sa korte. Apan dihang gilusad na ang operasyon misukol matud pa ang suspek sa kapulisan pinaagi sa pagbunlot sa iyang pusil punting sa kapulisan maong siya giunhan nalang ug pusil igo sa lawas.
Gidala pa sa usa ka ospital sa lungsod ang suspek apan gideklara na kining dead on arrival.
Si Gutierez apil matud pa sa subject sa gipahigayong one time big time niadtong nakalabayng simana apan wala kini masikop human nga wala kini sa iyang balay dihang gihimo ang halapad nga ronda.
Sa karon ang patayng lawas sa suspek gipahiluna na sa iyang pamilya.
