ESCALANTE CITY, NEGROS OCCIDENTAL – ginahanda na ang kaso nga robbery with homicide nga igapasaka batuk sa nadakpan nga isa sa tatlo ka mga suspek nga nagpangawat kag brutal nga nagpatay sa mag-asawa nga tag-iya sang lodging house sa syudad sang Escalante.
Sa ginpatigayon nga hot pursuit operation sang Escalante City PNP kag 62nd IB, nakilala ang suspek nga si Salcedo Lobaton 34 anyos, pumuluyo sang Purok Bulak, Brgy. Mandalagan siudad sang Bacolod.
Si Lobaton ang nadakpan sa balay sang iya pakaisa sa Sitio Caridad, Brgy. Rafaela Barera sa siudad sang Sagay.
Nagtuyo pa nga magpalagyo ang suspek gani ini ang naka-angkon sang pilas sa kamot matapos nga maka-sangit sa barbwire.
Angut sini, ginpahayag sang hepe sang Escalante PNP – Chief Insp Rollie Pondevilla, sang ila gin-usisa ang suspek, nag-ako na lang ini nga sya ang nagpatay kaupod sang duha ka iban pa niya nga kaupdanan sa mga biktima nga sanday Susana kag Alfonso Morales sa sulod mismo sang Susana Inn.
