Davao City – Arestado na sa Sto. Tomas PNP ang suspek nga milugos ug mipatay kang Kimberly Lagut Labrador, 12 anyos sa Barangay Tibal-og, Sayoon Area, Feeder Road 1, Sto. Tomas, Davao Del Norte.
Ang suspek mao si Randy Pasente Labramonte, 45 anyos, silingan ug kumpare ra usab sa amahan sa biktima.
Positibong gitudlo sa mga silingan si Labramonte nga maoy katapusang nakauban sa biktima sa pinuy-anan niini niadtong Huwebes alas-sais ang takna sa kabuntagon.
Dungan sa pagka-missing sa biktima ang pagkahanaw usab sa maong dapit sa suspek rason nga siya ang gitumbok gilayon sa hot pursuit operation sa kapulisan.
Nadakpan ang suspek sa balay sa iyang bayaw ug sa dihang gikapkapan sa mga otoridad nakuha sa posisyon niini ang usa ka pakete nga gituohang shabu.
Napasakaan na ang suspek sa kasong pagpatay samtang gipaabot pa ang resulta sa otopsiya aron matino kun nalugusan ang biktima.
Kahinumduman nga nadiskubrehan na lamang sa pamilya ang patay nga lawas sa biktima nga naglutaw sa tubigan nga bahin samtang naka hubo na sa iyang underwear.
RadyoMaN Erin Lumosbog
