Roxas City, Capiz – Magapangatubang sang patung-patong nga kaso ang 33 – anyos nga si Jerry Aldrine Bazar y Pangan, suspek sa carnapping kag insidente sang hit and run sa banwa sang Balasan sa Iloilo.
Patay gid ang 64-anyos nga si Alejandro Navales matapos ini ang nabunggoan sang salakyan nga ginamaneho sang suspek sa carnapping pasado alas 5 sang hapon sa Barangay Camambugan banwa sang Balasan, Iloilo.
Gindala pa sa Jesus M. Colmenares District Hospital si Navales apang gindeklarar ini sang doktor nga dead-on-arrival.
Nahibaluan nga antes sini, ginlagas sang mga katapo sang Pilar PNP kag Capiz 1st Provincial Mobile Force Company ang isa ka salakyan nga ginaalegar nga gin-carnap sa syudad sang Iloilo matapos wala nagpundo sa border checkpoint sang Pilar kag Kinalkalan checkpoint sa diin nagpalagyo ini padulong sa banwa sang Balasan, Iloilo kag didto natabu ang pagkabunggo sang suspek nga si Jerry Aldrine Bazar y Pangan, 33-anyos sang Fairville Subd, Phase 2, Sta. Barbara, Iloilo sa biktima nga nagamaneho man sang motorsiklo.
Nahibaluan nga halin pa sa syudad sang Iloilo ang salakyan apang ginpalagyo sang suspek padulong sa syudad sang Roxas.
Ini ang nasundan sang tag-iya pinaagi sa GPS matapos nag-park ang suspek sa Robinsons Mall sa Pueblo de Panay, Lawaan, Roxas City.
Apang na-monitor sini nga siya ang ginasunod kabangdanan nga liwat nagpalagyo padulong sa banwa sang Pilar.
Sa subong yara na sa paghinakop sang Balasan Municipal Police Station ang nasambitan nga persona.
Natigayon nga madakpan sang mga kapulisan ang suspek sa Barangay Tingui-an, Balasan, Iloilo matapos nag-overheat ang salakyan nga ginasakyan sini matapos nga nagangkon nga damage sa unahan nga porsyon bangud sa pagkabunggo.
