NEGROS OCCIDENTAL – Natigayon nga madakpan sa ciudad sang Silay ang isa samga suspek nga nagpang hold-up sang isa ka collector sa Brgy. Villamonte, Bacolod City.
Ang suspek nakilala kay Jobert Tagihanon, 35 anyos, pumuluyo sang Brgy. Tinampaan, Cadiz City kag temporary naman nga naga-istar sa karon sa Silay City.
Ginpahayag ni Silay PNP chief Police Supt. Willie Diel nga nagpatigayon sila sang checkpoint sa area sang Carmela Subdivision sang may yara sang riding-in-tandem nga nag pondo kag naglikaw sa checkpoint.
Ginklaro ni Diel nga nadakpan si Tagihanon matapos nga may yara sang patrol car nga naka stand-by agud mangpang-lagas sang mga motorsiklo nga naga-isol sa ila ginpahamtang nga checkpoint.
Ginlagas sang Silay PNP ang mga suspek kon diin nadakpan si Tagihanon matapos nga natumba ang ila ginasakyan nga motor, apang nakapalagyo naman ang iya kaupod nga nakilala kay Rommel Demaala matapos nga nagsulod sa kampo.
Gintiro sang pulis si Demaala apang suno kay Diel, posible nga wala ini naigo bangud wala sang tinulo sang dugo sa iya ginsudlan nga kampo nga ginalutsan nga amu naman ang access road sa airport.
