Roxas City, Capiz – Ginpasakaan na sang kaso nga attempted murder with the used of unlicensed firearms sang Roxas City PNP ang suspek nga si Godofredo Jagus nga nagluthang sa tricycle driver nga si Benjie Diestro kahapon nga adlaw sa Magallanes Street Roxas City. Una nga ginpanginwala sang suspek nga si Jagus nga ini ang nagluthang sa kay Diestro apang ini ang positibo nga gintudlo sang biktima sang sila ang ginpa-atubang sa isa kag isa kabangdanan nga ini man ang nag-ako sang ulihi. Suno sa information officer sang Roxas City PNP nga si Police Master Sargeant Ramil Arcangeles, sa ginpatigayon nga follow-up operation narekober sa poluy-an sang suspek ang isa ka unit sang .45 caliber pistol, duha ka magazine lakip ang 11 ka mga bala. Ginpahayag ni Arcangeles nga ang wala nabayran nga utang balor P5, 000 pesos sang biktima sa suspek amo ang ginhalinan sang shooting incident. Nahibaluan nga makapila ka beses na nga ginasukot ni Jagus ang biktima apang napaslawan ini nga makabayad. Sa subong yara padayon nga nakahunong sa lock-up cell sang Roxas City PNP ang nasambitan nga suspek.
