Davao City – Namatikdan na sa pamilya ni Harland Ocampo Garvida, 40 anyos nga suspek sa pang-hostage kaganihang alas 9:45 sa buntag sa usa ka pamilya sa may #34 Acacia Lane Woodridge Park Subdivision, Maa ning dakbayan nga unusual na ang nilihokan sa suspek.
Sa eksklusibong interbyu sa DXDC RMN Davao kang Talomo PNP station commander PCI Ronald Lao nga wala na sa insaktong pangisip ang suspek kinsa kalit lang nga niataki sa sa giabangang balay sa negosyanteng si Allen de Vera.
“According sa iyahang mama nga naa daw ni siya’y mental disorder dili siya kakuan kung unsa gyuy plano,” matud ni Lao.
Na-rescue sa mga awtoridad ang asawa, anak ug usa ka lolo sulod sa maong panimalay samtang nagpaalim pa ang katabang nga si Anna Cecilia Flores kinsa nasamdan human maigo sa pagbuto sa pusil sa paginilugay sa suspek ug ni De Vera, samtang si De Vera adunay mga bun-og ug bali sa abaga human sa insidente.
Angol usab ang pulis nga si PO3 Junrell Tan human kini madunggaban sa suspek sa iyang abaga.
“Lahi gyod ang iyang awra ug porma maong niduol na atong SWAT aron i-negotiate mao ra gihapon ug gidunggab niya atong SWAT mao tong pagtan-aw sa iyang kaubang SWAT nga na endanger na ang kinabuhi sa iyang kauban mao tong gi-neutralized na ang suspect kaganiha,” sumala ni Lao.
Gisulayan pag dala sa 911 ang suspek apan gideklara na kining dead on arrival sa mga doktor sa Southern Philippines Medical Center.
Sumala ni Lao kanhi tag-iya ang suspek sa maong balay nga girentahan sa pamilyang De Vera.
Samtang sa interbyu usab sa pag-umangkon sa suspek nga si Michael Garvida gibutyag niini nga aduna nay ginatumar nga tambal ang ilang uyuan ug aduna kiniy mga higayon nga gusto kining muadto sa maong panimalay.
Gipahiluna na sa inahan sa suspek ang patayng lawas niini kinsa nagpabilin pa sa morgue sa SPMC.
RadyoMaN Aimee Guinita
