Sa interbyu sa DXDC RMN Davao kang Police Major Jack Tilcag, Station Commander sa Calinan Police Station, giingon niini nga kasong rape with homicide ang ipasaka batok sa suspek nga giilang si Joshua Pilongo, 20 anyos nga taga Brgy. Lacson, Calinan ning syudad.
Segun ni Tilcag nga gi-andam na ang mga dokumento ug mga affidavit aron i-presenta ngadto sa piskalya aron hingpit nang mapasaka ang maong kaso.
“Ang importante ana bantayan gyud nato ang atong mga anak, bantayan nato atong mga apo. I-monitor gyud nato asa sila samot na kung holiday tutokan gyud nato ang atong mga bata. I-monitor gyud nato from school,” sulti ni Tilcag.
Nahinabi sab sa DXDC News Team ang amahan sa biktima nga si alias Mel nga wala kini nagdahum nga mahitabo ang brutal nga pagpatay sa iyang anak. Padayon kining nanawagan og hustisya sa gidangatan ni alyas Ann kinsa gilugos-patay sa kapuyo sa paryente sa biktima sa nasampit nga barangay.
“Gitan-aw nako akong anak di na gyud ma itsura kay pagtan-aw nako didto daghan samad. Okay lang unta kun wala gi-apil ang kinatawo, gi chop-chop pa gyud og naa pay samad sa dughan.” sulti ni Mel.
Gidugang pa sa amahan nga pangandoy sa iyang anak nga mahimong maestra apan tungod sa nahitabo nahanaw kini.
Ang maong biktima ipahiluna ug ilubong sa Sitio Doles sa nasampit nga lugar karong adlawng Sabado, Abril 15, 2023.
RadyoMaN Don Pulayao
