Natigayon nga madakpan sang gintingub nga puwersa sang Batad kag Balasan PNP ang driver sang single nga motorsiklo nga naghold-up sa iya pasahero kagab-i (June 6) sa banwa sang Batad, Iloilo.
Priso na karon sa Batad Police station ang suspek nga ginkilala kay Nelbert Francisco, 25 anyos sang barangay Camambugan, Balasan, Iloilo.
Ginpahayag ni Police Staff Sgt. Warjohn Suarte sang Batad PNP nga natabu ang insidente alas 10:40 kagab-i sang magsakay ang biktima nga si Shesan Charm Mabitad sa motorsiklo sang suspek gikan sa Balasan kag nagpadul-ong sa banwa sang Batad.
Subong man, pag-abot sa barangay Batad Viejo, Batad, Iloilo gintayaan sang suspek sang kutsilyo ang biktima kag nagdeklarar sang hold-up.
Nakuha sang suspek sa biktima ang 4,500 pesos nga cash kag cellphone nga nagabalor sang 16 mil pesos.
Pagkatapos sini, nagpalagyo balik sa Balasan ang suspek samtang nagreport naman sa Batad PNP ang biktima kag kaina sang aga, natigayon nga madakpan ang suspek sa ginhiwat nga pursuit operation sang kapulisan.
